Домой Жаңылыктар Өкмөт кыргыз тилин өнүктүрүү үчүн суперкомпьютер сатып алды

Өкмөт кыргыз тилин өнүктүрүү үчүн суперкомпьютер сатып алды

6

 

Бийлик кыргызча маалыматтарды иштеп чыккан жасалма интеллектти киргизүү боюнча иштеп жатат.

Президенттин администрациясында суперкомпьютердин бет ачары болуп өттү. Анын жардамы менен мамлекеттик тилди, илим жана технологияны өнүктүрүү пландалууда. Бул тууралуу министрлер кабинетинин маалымат кызматы билдирди.

Мамлекеттик тилди өнүктүрүү программасынын алкагында өкмөт 2022-жылы NVIDIA суперкомпьютерлерин сатып алууга каражат бөлгөн. Анын кубаттуулугу 1 петафлопсту түзүп, секундасына 1 квадриллион операцияны жүргүзүүгө ылайыкталган.

Мамлекеттик тил жана тил саясаты боюнча улуттук комиссия «Улут Софт» компаниясы менен биргеликте кыргызча маалыматтарды иштеп чыккан жасалма интеллектти киргизүү боюнча иштеп жатканы айтылды.

Ал жазылган текстти окуп жана айтылган сөздү жаза тургандай болот, ошондой эле анализдеп, тексттерди түзөт. Мындай программа илим-билим жана массалык коммуникация тармактарында колдонулат.

Өкмөт башчынын орун басары Эдил Байсалов өлкөдө кыргыз тили соңку техникалык ойлоп табууларга, заманбап технологияларга, жасалма интеллектилерге жеткиликтүү болушу керектигин белгилеген.

«Биз ар кандай технологиялык жардамчылар кыргызча сүйлөй алгыдай кылышыбыз керек. Бул баарыбызга, өзгөчө майыптыгы бар адамдар үчүн керек. Суперкомпьютер ата мекендик илим жана экономика үчүн күнү-түнү иштеши шарт. Ал жабдууну мамлекеттик мекемелер, окуу жайлар жана башка кызыкдар тараптар колдоно алат», — деди Байсалов.

Аны менен катар мамлекеттик органдарга мамлекеттик тилди өнүктүрүү боюнча бир катар иштерди аткарууга тапшырма берилген, анын ичинде Википедияга кыргызча макалаларды жайгаштырууну көбөйтүү милдети коюлган.