Коронавируска каршы вакцина алгандыгы тууралуу жасалма сертификат берген дарыгерлер иштен алынды. Бул туралуу Саламаттык сактоо министрлиги билдирди.
Маалыматка ылайык, Бишкектеги №2, №8, №10, №11, №19, 20 медицина борборлорунун жетекчилери, бир медайым иштен алынды. Чогулган материалдар укук коргоо органдарына өткөрүлүп берилген.
Ал эми, Ленин райондук үй-бүлөлүк медицина борборлору боюнча бөлүм башчы өзү жазган арыздын негизинде кызматтан кетти.
Эскерте кетсек, Саламаттык сактоо министри Алымкадыр Бейшеналиев 7-декабрда эмдөө сертификаттарынын сатылышын иликтеген комиссия түзүлгөнүн билдирген.
Белгилей кетсек, коронавируска каршы эмдөөнүн жеке QR-код ыйгарылган санарип сертификаттар ушул жылдын июль айынан тартып берилет. Документти коронавируска каршы эмделгендер, акыркы 6 айда коронавирус менен ооругандар же ПЦР тесттин үч күнгө жарактуу жыйынтыгы барлар алышат.
