Кыргызстанда билимдүү коомдун болушу — айрым адамдардын эле каалоосу эмес, мамлекеттик маанилүү маселе. Бул туурасында президент Садыр Жапаров бүгүн Чүй облусунун Мыкан айылындагы мектептин ачылыш аземине катышып жатып айтты.
Кыргызстанда билимдүү коомдун болушу — айрым адамдардын эле каалоосу эмес, мамлекеттик маанилүү маселе. Бул туурасында президент Садыр Жапаров бүгүн Чүй облусунун Мыкан айылындагы мектептин ачылыш аземине катышып жатып айтты
Өлкө башчынын маалымат кызматынын билдиргенине караганда, Жапаровдун президент катары региондорго болгон биринчи сапары Чүй облусунун Аламүдүн районундагы Мыкан айылынан башталган. 31-январда мамлекет башчы бул айылдагы окуу мекемесинин курулушунун биринчи кышын коюуга катышкан.
«Билим берүү — туруктуу өнүктүрүүнүн эң ишенимдүү пайдубалы. Бүгүнкү күндө глобалдуу атаандаштыкка билимдүү коом гана туруштук бере аларын мезгил өзү көрсөтүп жатат. Кыргызстанда билимдүү коомдун болушу — айрым адамдардын эле каалоосу эмес, бул мамлекеттик маанилүү маселе. Биздин билим берүү системабыз өлкөнү өнүктүрүүнүн негизги механизми болушу зарыл», — деди Жапаров салтанатта сүйлөп жатып.
Ал президент катары өз ишинде өлкөдөгү билим берүү мекемелерине өзгөчө көңүл бурарына, 9 айдын ичинде билим жайынын курулуп, ишке берилип жатканы кубанычтуу окуя экенине токтолду. Мамлекет башчысы татыктуу тарбия бала бакчадан башталса, билимдин пайдубалы мектептен түптөлөрүн белгилеген.
«Келечек ээлери болгон балдарыбызды дүйнөдө билим жаатында атаандаштыкка чыгуусу үчүн XXI кылымдын талаптарына ылайык сапаттуу билим берүү сиздерге түздөн-түз байланыштуу. Педагогикалык чеберчиликти мезгилдин талабына ылайык өркүндөтүшүңүздөр керек. Анткени ар тараптуу өнүккөн мугалим гана билимдүү, тарбиялуу окуучуларды өстүрүп чыгарат», — деп кайрылган мектептин мугалимдерине.
Жапаров айылдардын абалын жакшыртууга жана региондордун жашоочуларынын социалдык көйгөйлөрүн чечүүгө салым кошкон ишкерлерге, демөөрчүлөргө ыраазычылык билдирди.
Эске салсак, ал биринчи сапарында Жапаров эми бардык күч-аракетин элдин ишеничин актоого жана өлкөнү туруктуу өнүктүрүүгө жумшай турганын билдирген.Президенттин маалымат кызматы мектептин курулушу «1-сентябрда пайдаланууга берилери күтүлөрүн» айткан. Аны Бүткүл дүйнөлүк мусулман жаштары ассамблеясы каржылап, 500 орундуу мектеп, спорт зал, административдик имарат, мечит, футбол талаасы жана оюн аянтчалары курулары кабарланган.
Мектеп бир нөөмөттө 300 окуучуга эсептелген. Окуу эки нөөмөттө жүргүзүлөт.
